29 vite pas rrëzimit të shtatores së diktatorit Enver Hoxha në Tiranë, në Teatrin Kombëtar u organizua një aktivitet për të përkujtuar këtë ngjarje. I pranishëm në aktivitet, Lulzim Basha, kryetar i Partisë Demokratike, e konsideroi komunizimin një mëkat dhe padrejtësi kombëtare që shqiptarët ia bënë njëri-tjetrit.
Kryeopozitari Basha e konsideroi të domosdoshme një ndjesë të sinqertë dhe pendesë për mëkatet kombëtare, pasi në këtë mënyrë mund të gjejmë forcën për të realizuar ëndrrën e papërfunduar, Shqipërinë si gjithë Evropa.
“Pas lëvizjes së dhjetorit, për 2 muaj, natë pas nate, ditë pas dite, pasiguria dhe pezmi po na pushtonte, kur dukej se pak ose aspak po lëvizte. A ka kombi një shpirt? A ka populli një shpirt? A ka masa një shpirt? Po, ka shpirtin e më të guximshmit mes nesh. Ka shpirtin e më kurajozit mes nesh. Ka shpirtin e atij që shpresën e vet e ndez për të gjithë Shqipërinë, për të gjithë shoqërinë, për të gjithë kombin dhe bën që të ndizet në çdo zemër forca dhe kurajo që di të shkallmojë edhe forcën më të pathyeshme të diktaturës si 29 vite më parë. E çfarë është kjo para të cilës gjendemi sot, përveçse përmasa e papaguar e mëkatit tonë kombëtar. E mosreflektimit tonë deri në fund për padrejtësisë që përjetuam dhe që ushtruam ndaj bashkëqytetarëve tanë. Për faktin që shkelëm dhe përdhosëm krenarinë e tjetrit paditur se kështu do të përdhosnim edhe tonën. Mungesën e ndjesës së sinqertë për ata që sakrifikuan, burra dhe gra kurajoz, disidentë politikë, priftërinj dhe hoxhallarë, intelektualë dhe artistë. Por kur nuk është vonë të kërkojmë ndjesë dhe të pendohemi për mëkatet tona personale, për mëkatet tona kombëtare dhe t’i kërkojmë Zotit të na japi forcë dhe t’i tejkalojmë së bashku si komb i virtytit dhe i vlerave me këtë provë të qëndresës së vlerave, përqafojmë edhe ne atë destin që Perëndia na ka vënë përpara syve, destinin e vetëm të shqiptarëve: Shqipëria si Evropa”, u shpreh Lulzim Basha.
Nga hapësira e Teatrit Kombëtar, Basha u shpreh në fund të fjalimit: “Le të betohemi së bashku se shpirtat tanë do të jenë bashkë deri në realizmin e qëllimit më fisnik që një komb mund të ketë, të sigurojë liri dhe dinjitet për fëmijët tanë.”
