Pas dosjeve të dërguara në SPAK nga ana e Operacionit Forca e Ligjit, Struktura e Posaçme Antikorrupsion ka filluar të veprojë duke sekuestruar aseset e disa prej grupeve kriminale.
4 banesa, 2 sipërfaqe trualli tokë-arë dhe truall ndërtimi si dhe 2 automjete luksoze dhe të blinduara janë asetet e para që SPAK i ka dërguar në gjykatë për t’i sekuestruar.
Lista e aseteve nis me pronat në qarkun e Shkodrës, përkatësisht banesë tre katëshe në Shkodër në pronësi të Artan Doçit, banesë dy katëshe në pronësi po të Artan Doçit, banesë dy katëshe plus papafinngo në pronësi të Martin Bletës, si të dyshuarit kryesorë në pengmarrjen dhe vrasjen e Jan Prengës më 17 janar 2020.
SPAK ka kërkuar gjithashtu edhe sekuestrimin e pasurive të ish-kokës së Bandës së Durrësit, Lulzim Berishës.
Dy automjete të markës Mercedez Benz ,prodhim viti 2012 dhe një BMË e blinduar, kërkohen nga SPAK që të sekuestrohen nga Gjykata pas sekuestros emergjente që ka vendosur më herët OFL.
Ndërkaq, lidhur me kërkesën për sekuestro të pasurive të Lulzim Berishës, ka reaguar edhe avokati i tij, Detar Hysi. “Ende nuk jemi vënë në dijeni të vendimit të SPAK për të kërkuar sekuestro në Gjykatës. Për çdo veprim do të ndjekim rrugët ligjore. Kërkesën për sekuestro e mësova nëpërmjet medias, kemi dhënë shpjegimet tona pranë OFL-së”, tha ai në një prononcim për Report Tv. Ndër pronat e tjera janë banesë dy katëshe me njësi shërbimi në pronësi të M.D si dhe tokë arë me sipërfaqe 1541 m2 dhe truall me sipërfaqe 350 m2, po në pronësi të M.D në shkodër.
Njoftimi i SPAK:
Lidhur me vlerësimin e kërkesave për sekuestrim në kuadër të Aktit Normativ
Pas hyrjes në fuqi të Aktit Normativ Nr.1, datë 31.01.2020, Drejtoria e Përgjithshme e Policisë së Shtetit, duke filluar nga data 07.02.2020 deri me datën 20.02.2020, ka paraqitur në Prokurorinë e Posaçme kundër Korrupsionit dhe Krimit të Organizuar Tiranë, 24 kërkesa për vlerësim sekuestroje për pasuri të ndryshme të bllokuara në kuadër të zbatimit të parashikimeve të Aktit Normativ. Të gjitha kërkesat dhe dokumentacioni përkatës shoqërues, rast pas rasti, po i nënshtrohen vlerësimit nga prokurorët e Prokurorisë së Posaçme. Për disa prej tyre i është kërkuar Policisë së Shtetit plotësimi me dokumentacionin e plotë, që sipas Aktit Normativ, Policia e Shtetit duhet të sjellë bashkëlidhur me kërkesën për vlerësim sekuestroje.
Prokuroria e Posaçme, sot me datë 20.02.2020 ka dërguar aktet për 5 (pesë ) raste, për miratim sekuestroje në Gjykatën e Posaçme të Shkallës së Parë për Korrupsionin dhe Krimin e Organizuar, për pasuritë e mëposhtme :
Banesë 3 (tre) kate (Shkodër)
Banesë 2 (dy) kate (Shkodër)
Banesë 2 (dy) kate plus papafingo (Shkodër)
Automjet tip “Mecedez Benz”, prodhim vitit 2012.
Automjet tip “BMW”, i blinduar.
Banesë 2 (dy) kate plus Njësi Shërbimi (Shkodër)
Tok arë, me sipërfaqe 1541 m2 (Shkodër)
Truall me sipërfaqe 350 m2 (Shkodër)
Rastet e tjera të referuara deri tani nga Policia e Shtetit janë duke u vlerësuar nga prokurorët e Prokurorisë së Posaçme dhe në përfundim, rast pas rasti, do të njoftohet mënyra e zgjidhjes së tyre.
