Mbrëmë policia njoftoi se në spitalin e Traumës ka ardhur një person me plagë të rënda për shkak të aksidentit që kishte ndodhur në aksin Fushë-Krujë-Milot. Policia ndërhyri duke ndaluar personat që gjendeshin nëpër makinat që u përfshinë në përplasjen e rëndë, ndërkohë që u mësua se përplasja ka rezultuar fatale për një person që po udhëtonte me motor. Njëra nga makinat e ka goditur motorin në anësore dhe më pas një tjetër e ka marrë para.
Sipas policisë i plagosuri nga aksidenti që u regjistrua mbrëmë në Fushë Krujë ka ndërruar jetë në spitalin e Traumës në orët e para të ditës së sotme si pasojë e plagëve të rënda që kishte marrë. Viktima është Agustin Marku 40 vjeç.
Aksidenti ku u përfshinë tre makina ndodhi mbrëmë në autostradën Fushë Krujë – Milot në afërsi të fshatit Gramëz. Drejtuesi i makinës tip ‘Opel’ me targa SH 25 97 E dyshohet sipas policisë që të ketë qenë dhe shkaktari i aksidentit. Ai ka përplasur motorin me të cilin po udhëtonte 40-vjeçari dhe më pas një makinë tip ‘Benz’ e ka përplasur nga pas ‘Opeli’-n.
Drejtuesi i ‘Opelit’ u shpreh se nuk e pa motorin, dhe nuk e ka kuptuar se si ka ndodhur ngjarja, ndërkohë që policia dhe ekspertët janë kthyer sërish në vendin e ngjarjes për të rindërtuar edhe njëherë skenën e aksidentit që i mori jetën Markut!
