SPAK dhe një sërë strukturash të tjera janë angazhuar që prej mbrëmjes së të enjtes, për hetimin dhe zbulimin e të gjitha fijeve të një afere kriminale me shtrirje ndërkombëtare. Fokusi ka të bëjë më transportin me traget në Vlorë dhe varrosjen në Shqipëri të lëndëve kancerogjene, të kamufluara si produkte pastrimi të kompanisë “Delfini 1”. Prokuroria reagoi mbrëmë vonë duke deklaruar se ka kërkuar informacione urgjente nga prokuroria e Vlorës pas rastit.
Sipas të dhënave drejt Vlorës janë nisur edhe oficerë të policisë gjyqësore të SPAK të cilët do të kryejnë të gjithë praktikën hetimore për të nisur më pas hetimin konkret mbi gjithçka ka ndodhur me këtë transport.
Në fakt nuk është hera e parë që flitet për transporte të tilla si në bregdetin e Vlorës ashtu edhe në atë të Durrësit dhe të Lezhës, por asnjëherë më parë ky akt nuk iu nënshtrua hetimit në këtë formë. U fol dhe u përfol dhe më pas u mbyll si çështje pa dërguar asnjë person në pranga si përgjegjës.
Ditën e sotme pritet të dilet në një konkluzion mbi të dhënat paraprake të produkteve, ndërkohë që janë marrë në pyetje të gjithë të ndaluarit. Fakti që çështja është në duart e SPAK detajet kryesore të hetimit janë mbajtur sekret.
Mbetjet vinin me traget nga Italia në drejtim të portit të Vlorës me destinacion përfundimtar Shqipërinë. 6 persona janë vënë në pranga si përgjegjës, ndër ta edhe një gruas. Sekuestrohet në cilësinë e provës materiale trageti, një fugon mallrash dhe një sasi e madhe e dyshuar me mbetje amianti.
Në bazë të informacioneve të marra se me një traget që ishte nisur nga Italia po transportohej një sasi e konsiderueshme me mbetje të rrezikshme u organizua puna dhe në bashkëpunim me Policinë e Vlorës dhe atë Kufitare, u finalizua operacioni policor i koduar “Amiant”, në kuadër të të cilit u bë arrestimi në flagrancë i shtetasve:
Të arrestuarit
Kujtim Xhaferllari , 65 vjeç, banues në Vlorë
Arbër Çuni, 28 vjeç, banues në Vlorë
Festim Tafa, 72 vjeç, banues në Vlorë
Elisabeta Cuni, 55 vjeç, banuese në Vlorë
Zamir Kornuzi, 46 vjeç, banues në Vlorë
A.B 48 vjeç, banues në Vlorë
