Presidenti Ilir Meta po kërkon mbështetje nga të gjitha anët për të përligjur protestën që do të zhvillojë më 2 mars, për mbrojtjen e Kushtetutës siç e ka cilësuar ai.
Pasi ka përdorur emrat e disa diplomatëve të huaj në Tiranë dhe një sërë takimesh me ambasadorët e huaj, kreu i shtetit nuk ngurron të nxjerrë nga dollapi i Partisë Socialiste edhe ‘xhaketat e vjetra’ të kësaj force politike.
Kështu, Meta i është falur një socialisti që bën pjesë në gardën e vjetër të selisë rozë. Presidenti ka falënderuar ish-ministrin socialist Elmaz Sherifin për mbështetjen që po i jep sipas tij, kauzës së presidentit, edhe pse Sherifi e ka kritikuar në të kaluarën vetë Ilir Metën.
Postimi i plotë: Falënderoj ish-ministrin socialist, juristin e njohur z. Elmaz Sherifi për mbështetjen publike që i jep kauzës së Presidentit të Republikës, në mbrojtje të Kushtetutës dhe Gjykatës Kushtetuese, si çështje e të gjithë shqiptarëve pa asnjë dallim. Për sa i takon vërejtjeve që ka ndaj Ilir Metës në të shkuarën e siguroj se unë kam shumë më tepër vërejtje për Ilir Metën në të kaluarën. Por e falënderoj që e kupton shumë drejt se në 2 mars bëhet fjalë vetëm për të ardhmen e Shqipërisë.
Nuk ka Kushtetutë pa Gjykatë Kushtetuese me integritet.
Mbi Kushtetutën qëndron vetëm populli dhe Zoti!
Presidenti i nënshtrohet vetëm vullnetit të tyre!
Nuk ka Shqipëri pa shqiptarë!
Mirë se vini të gjithë në 2 mars!
