Kryeministri Edi Rama i ka cilësuar akuzat e bëra pas ndihmave të mbledhura nga Konferenca e Donatorëve për tërmetin, si një goditje poshtë brezit ndaj Shqipërisë.
Kryeministri Rama shkruan përmes një statusi në rrjetin social Facebook se opozita jashtë parlamentare e ka lëshuar gjuhën jashtë kontrollit.
Sipas Ramës, “ata janë të dënuar të përpëliten në zjarrin e urrejtjes së tyre e të çirren gjithnjë e më fort kundër qeverisë”.
“Sa më shumë Shqipëria forcon trupin e saj të brishtë, aq më shumë ata që e penguan, shfrytëzuan, dërrmuan për vite të tëra, dëshpërohen e lëshojnë gjuhën jashtë kontrollit! Tamam kur Shqipërisë i’u bë një deklaratë publike dashurie nga BE dhe bota mbarë në 17 shkurt, ata u marrosën…Mos humbim kohë me ta, janë të dënuar të përpëliten në zjarrin e urrejtjes së tyre e të çirren gjithnjë e më fort kundër nesh! Shqipëria i ka lënë pas dhe kërkon nga ne ta çojmë përpara; duke e forcuar çdo ditë, përmes reformave e punëve që s’u bënë kurrë në kohën e tyre të shkuar“, shkruan Rama.
