Finalizohet një tjetër operacion për goditjen e veprimtarisë kriminale në fushën e narkotikëve dhe armëmbajtjes pa leje. Operacioni i koduar “PARKIMI”, i zhvilluar nga Komisariati i Policisë Nr. 2, vuri në pranga 4 persona dhe një tjetër e shpalli në kërkim! Gjithashtu sekuestrohen tri armë zjarri, lëndë narkotike dhe një shumë parash, e përfituar nga shitja e lëndës narkotike.
Në vijim të punës për kontrollin e territorit, u bë kapja dhe arrestimi në flagrancë i shtetasve: K.S., 30 vjeç, banues në Tiranë, për veprat penale “Përshtatja e lokalit për përdorim droge “dhe ”Moskallëzimi i krimit”, E. K., 33 vjeç, banues në Tiranë, për “Prodhimi dhe shitja e narkotikëve, kryer në bashkëpunim”, E. K., 28 vjeç, banues në Tiranë, për “Prodhimi dhe shitja e narkotikëve, kryer në bashkëpunim”, T., 33 vjeç, banues në Tiranë, për “Moskallëzimi i krimi”.
Gjithashtu u bë shpallja në kërkim e shtetasit M. Ç., 28 vjeç, banues në Tiranë, për “Armëmbajtje pa leje”, “Prodhimi, mbajtja, blerja apo shitja e armëve të ftohta” dhe “Prodhimi dhe shitja e narkotikëve”. Shërbimet e Policisë kanë marrë informacione në rrugë operative se këta shtetas shpërndanin lëndë narkotike kokainë e kanabis në doza të vogla, në zona të ndryshme në Tiranë.
Gjatë operacionit në zonën e Selitës, nga kontrolli i ushtruar në banesën e M. Ç., i cili është dhe personi organizator i kësaj veprimtarie kriminale, Policia gjeti dhe sekuestroi tri armë zjarri pistoletë, doza me lëndë narkotike kokainë, 19 aparate celular, 10 ora dore, 600.000 lekë dhe 5000 euro. Gjithashtu, po gjatë kontrollit fizik të ushtruar në parkingun e lokalit të shtetasit K. S., shtetasve E. K., 28 vjeç dhe E. K., 33 vjeç, Policia u gjeti doza me lëndë narkotike kanabis. Vijon puna për kapjen e shtetasit të shpallur në kërkim!
