Mediat e huaja kanë ngritur alarmin, duke raportuar se një drogë e re, që i kthen njerëzit në një gjendje të rënduar si “zombi” ka hyrë tashmë dhen ë Evropë, pas SHBA-ve.
Substanca shkatërrimtare e njohur si “ksilazin”, ose ‘droga zombi’, pas konsumimit i detyron përdoruesit të qëndrojnë për orë të tëra të përkulur, në një gjendje të përgjumur dhe jo plotësisht të vetëdijshme. Sipas “Daily Mail”, droga po përdoret në Britani dhe ka shkaktuar deri më tani 11 viktima.
Sipas studimeve të kryera në SHBA, në përbërje të kësaj substance, kishte dhe qetësues anestetikë që përdoren për kafshë të mëdha. E njohur gjithashtu si ‘tranq’, substanca është aq e fuqishme sa mund të vërë në gjumë një elefant dhe efekti i saj te njerëzit është ekstrem.
Vëzhguesit thonë se trupat e përdoruesve përkulen, sytë e tyre ngrijnë dhe qëndrojnë në pozicione të pazakonta për orë të tëra.
Droga ksilazinë është gjithsesi relaksues respirator, prandaj ul ritmin e frymëmarrjes, të zemrës dhe tensionin e gjakut te përdoruesit, në nivele të rrezikshme. Shoqërimi i saj me droga opiate sjell rrezikun e mbidozës fatale. Mes efekteve të tjera janë çarje dhe infektime të lëkurës që shpesh nuk shërohen.
Ekspertët thonë se shumë rrallë përdoruesit zgjedhin vetë ta marrin ‘tranq’, por ajo u jepet atyre fshehurazi nga trafikantët dhe organizatorët. Shpeshherë drejtuesit e këtij trafiku vrasës e përziejnë ksilazinën me heroinën që shesin, ose me drogat me bazë opiumi si fentanili, për të zgjatur e intensifikuar efektin e tyre.
