Kthesa e fortë në rrugën e fshatit Çekrez të Gramshit dhe mbingarkesa në mjetin fouristradë kanë ndikuar te shoferi me iniciale M.Gj., 28 vjeç, banues në Tiranë, që të humbasë kontrollin dhe të dalë nga rruga.
Si pasojë e aksidentit kanë gjetur vdekjen dy shtetas sirianë dhe janë plagosur tetë shtetas të tjerë. Të plagosurit kanë marrë ndihmën e parë mjekësore në spitalin e Gramshit, por më pas janë transportuar për në Tiranë, ku pesë prej tyre ndodhen në gjendje kritike për jetën.
Ndërkohë policia ka nisur hetimet për zbardhjen e shkaqeve të aksidentit.
Shqipëria është përdorur vazhdimisht si rrugë kalimi për shumë refugjatë nga Siria dhe shtete të tjera të Lindjes së Mesme që synojnë Evropën Perëndimore, kryesisht Gjermaninë. Deri më sot kjo është ngjarja më e rëndë ku përfshihen refugjatë nga Siria.
