Vjollca Hoxha ka humbur betejën gjyqësore me aksionerët e ‘Supersport’, duke humbur kështu edhe mazhorancën në kompaninë Digitalb. Drejtuesja e Top Medias ka zbritur në 42% të aksioneve në Digitalb pasi Gjykata e Tiranës ka rrëzuar kërkesën për të bllokuar kalimin e një pjesë të aksioneve të saj dhe të fëmijëve te aksionerët e Supersport.
Biznesmenët Armand Duka, Saimir Mane, Agim Zeqo, Aleksandër Frangaj dhe Edmond Leka janë bërë tashmë aksionerë të Digitalb.
Ishte viti 2010 kur aksionerët e Digitalb synuan blerjen e Supersportit për një shifër prej 20 milionë euro, të cilat do të paguheshin me këste brenda 10 vitesh. Duke qenë se pagesa nuk u finalizua brenda kësaj periudhe, aksionerët e Supersport kërkuan dëmshpërblim financiar, por familja Hoxha raportohet se ka refuzuar, ndryshe nga aksionerët e tjerë.
Në këto kushte, aksionerët e Supersport kërkuan në gjykatë që të merrnin si dëmshpërblim aksionet e Vjollca Hoxhës e fëmijëve të saj në Digitalb.
Menjëherë pas publikimit të vendimit, Tv Klan ka reaguar duke publikuar në faqen ‘online’ të gjitha shkrimet e protaleve që raportojnë mbi humbjen e mazhorancës së Vjollca Hoxhës në Digitalb.
Vitin e kaluar u mor vendimi që Tv Klan të përjashtohej nga Digitalb, çka raportohet se i ka shkaktuar jo pak probleme televizionit të drejtuar nga Aleksandër Frangaj.
Dy grupet më të mëdha mediatike ndodhen prej muajsh në përplasje me njëra-tjetrën, ndërkohë që pak ditë më parë në Gazetën Shqip u publikua një artikull me titull: “Pse po sulmohet Top Channel?”, ku Frangaj ishte një prej të akuzuarve.
-“DigitAlb-it i janë grabitur 32 mln euro”, Top Channel: Ja pse po na sulmojnë
