Sokol Sadushi, i cili tani gjendet në postin e drejtorit i Shkollës se Magjistraturës, është kandidati i parë në radhët e juristëve për tre pozicione të lira në fushat e së drejtës administrative, civile dhe penale në Gjykatën e Lartë që po realizon seancën dëgjimore para anëtarëve të KLGJ. Para anëtarëve të KLGJ, Sadushi tha se e kërkon këtë detyrë sepse do të përballet, duke kërkuar sfidën me veten dhe me pozicionin që i ofron ajo përballje
Sadushi vuri theksin: “Vetëm nuk bëj dot gjë por me kolegë që të arrijmë atë që duhet. Gjykata e Lartë të kthehet në një gjykatë ligji dhe jo gjykatë provash. Qenia prej 13 vitesh si anëtar i Gjykatës Kushtetutës është një përparësi. Është një mandat i plotë 9-vjeçar që kërkoj të marr në Gjykatën e Lartë. Sfidë kryesore e Gjykatës së Lartë është shndërrimi i saj në gjykatë ligji.
Marrja e masave organizative, procedurale për mënyrën sesi do të evadojë numri i çështjeve është sfida e dytë. Së treti Gjykata e Lartë ka nevojë të marrë legjitimitetin që i nevojitet. Kam objektivat e mia në pozicionin e gjyqtarit të ardhshëm. Një strategji institucionale është e nevojshme, ajo Gjykatë nuk ka një strategji. Është një numër astronomik çështjesh por mund të përballohet.
Evadimi i stokut do kërkojë kohë. Që gjyqtarët të japin vendime në kohë dhe shpejt duhet të ndihmohen nga një trupë, njësia e shërbimit ligjor brenda gjykatës. Nuk është e lehtë por ka metoda që mund të bëjnë që ky numër i madh çështjesh të kenë mundësi të ndihmohen nga disa struktura brenda gjykatës”!
Në garë për këto poste janë edhe juristët e spikatur Ilir Panda dhe Ervin Pupe. Në përfundim të këtij procesi, Këshilli do të kryejë vlerësimin dhe pikëzimin përfundimtar të tre kandidatëve jogjyqtarë, nga katër pozicione që janë gjithsej dhe do t’i propozojë Presidentit të Republikës emërimin e tyre gjyqtarë në Gjykatën e Lartë.
Këshilli i Lartë Gjyqësor po vijon procedurën e verifikimit të kushteve dhe kritereve ligjore të kandidimit për kandidatin për pozicionin e katërt nga radhët e juristëve të spikatur, si edhe vendosi në mbledhjen e datës 26.2.2020 hapjen e procedurës së ngritjes në detyrë në Gjykatën e Lartë, nga radhët e gjyqtarëve. n.k/Fjala.al/
