Ditën e sotme, në orën 12:00 do të zhvillohet seanca gjyqësore në gjykatën e Përmetit për të dhënë masën e sigurisë për të arrestuarit në kuadër të operacionit “Mezhgorani”, ku mes tyre janë edhe botuesi i njohur Henri Çili dhe biznesmeni Sait Fishta nga Shkodra.
Hetimi i cili kishte nisur që në shtatorin e vitit të kaluar, për “Falsifikim të kartëmonedhave” bëri që shumë persona të përfundonin pas hekurave.
Gjatë hetimit policia dhe prokuroria ra edhe në gjurmët e Henri Çilit i cili akuzohet për ndikim në Gjykatën e Lartë për përshpejtimin e gjykimit për dy dosje të dy të dënuarve përjetë, me qëllim që ato të gjykoheshin në 50 dosjet e para.
Sipas policisë, dy rastet kur Henri Çili dyshohet se ka marrë përsipër të ndikojë tek autoritetet e drejtësisë lidhen me lirimin e dy të dënuarve me burgim të përjetshëm, Arbjon Aliko, për vrasjen e efektivit të RENEA-s në 2015 në Lazarat, Ibrahim Basha, si dhe për lirimin e Feti Yzeiraj i dënuar për vrasjen e Shefo Durajt, në shenjë hakmarrje pasi babai i tij, Llane Duraj i kishte vrarë gjyshin në ‘68-ën.
Të dy të dënuarit me burgim të përjetshëm, me vendim të formës së prerë në Gjykatën e Apelit, kanë bërë rekurs në Gjykatën e Lartë dhe si relator kanë Ardian Dvoranin, i cili është iu vetmi gjyqtar që ka mbetur në këtë institucion. Dvorani është aktualisht kryetar i Këshillit të Emërimeve në Drejtësi. Nga ana e tij, Dvorani e ka mohuar të ketë pasur një takim me Henri Çilin për këtë çështje.
Henri Çili akuzohet për një sërë veprash penale, si “Fshehja e të ardhurave”, “ Pastrimi i produkteve të veprës penale ose veprimtarisë kriminale”, “Falsifikimi i dokumenteve”, “Mashtrimit”, “Ushtrimi i ndikimit të paligjshëm ndaj personave qe ushtrojnë funksione publike” dhe “Falsifikimi dokumenteve” në bashkëpunim.
Një ditë pas arrestimit, botuesi dhe pedagogu Henri Çili ka folur për oficerët e Policisë Gjyqësore, ndërsa ka mohuar kategorikisht akuzat që rëndojnë ndaj tij.
Në të gjitha dëshmitë që ka dhënë, në një orë e gjysmë seancë me pyetje në ambientet e Drejtorisë Vendore të Policisë së Gjirokastrës, Henri Çili mësohet të jetë shprehur se s’ka kryer asnjë shkelje për akuzat që i bëhen dhe se gjithçka sipas tij është tërësisht e manipuluar. Mes të tjerash, ai ka thënë se do t’i kundërshtojë në momentin e duhur me prova dhe fakte.
Ndërkaq, ditën e djeshme është arrestuar edhe administratori i pronave të Henri Çilit, Betim Shkupi, i cili së bashku me Aristidh Çolin e kanë çuar në 30 numrin e të arrestuarave.
