Ish-deputeti i Partisë Demokratike, Klevis Balliu ka përfunduar sërish në gjykatë. Ashtu si herën e kaluar edhe këtë radhë, Balliu do të merret i pandehur bashkë me 12 banorë të Astirit.
Për këtë arsye, Gjykata Penale e Tiranës ka kaluar për gjykim dosjen penale ndaj ish-deputetit të PD-së Klevis Balliu dhe banorëve të Astirit, për protestat që pengojnë realizimin e projektit të unazës së re dhe për ushtrimin e dhunës ndaj policisë.
Sipas vetë Balliut, nuk ka asnjë provë për ushtrim të dhunës ndaj policisë si nga ana e personit të tij ashtu edhe të banorëve. Nga ana tjetër, sipas Balliut, nuk arrestohet askush për vjedhje votash.
“Nuk ka prova për dhunë nga banorët drejt Policisë. Nuk ka asnjë provë as ndaj meje dhe as ndaj banorëve por ata nuk e pushojnë çështjen. Nga ana tjetër nuk kemi asnjë të arrestuar për vjedhje votash. Ky pushtet do të bjerë dhe banorët do marrin atë që i takon. Të shkojmë sot t’i bëjmë me dije kësaj qeverie të korruptuar se koha e tyre ka mbaruar. Ka ardhur koha e qytetarëve shqiptarë dhe ata pushtetarë që i kanë vjedhur ka mbaruar”, u shpreh Balliu.
