Serbia duket se nuk tërhiqet nga lobimi i saj në SHBA kundër Kosovës që kjo e fundit të heqë taksën 100 për qind ndaj mallrave serbe.
Presidenti serb, Aleksandër Vuçiç ka theksuar se nuk ka e ka aspak problem të takohet me kryeministrin Albin Kurti dhe presidenti Hashim Thaçi, por këta dy të fundit sipas tij, duhet të heqin më parë taksën ndaj Serbisë.
Vuçiç i cili po qëndron për një vizitë zyrtare në Shtetet e Bashkuara të Amerikës, ku edhe pritet të takohet me presidentin Thaçi, iu tha gazetarëve në Uashington se, ai ishte mirënjohës se sikurse Grenell ashtu edhe Palmer, janë shprehur insistues që Kosova të heqë taksën si dhe kanë kundërshtuar idenë e Albin Kurtit.
“Ata mendojnë se është e rëndësishme që të hiqet tarifa në mënyrë që të mund të diskutojmë çështje të rëndësishme, thelbësore. Nuk është problem për mua të takoj Thaçin dhe Kurtin në ndonjë panel, por nuk do të ketë diskutime për çështje thelbësore dhe për statusin derisa të hiqen tarifat”, deklaroi Vuçiç, i cili theksoi se këto fjalë ia ka thënë edhe Palmerit.
Vuçiç, po ashtu ka folur edhe rreth një takimi të mundshëm ditën e nesërme me Thaçin, por i pari i Serbisë, ka thënë se nuk e di nëse mund të ketë një takim të tillë.
“Unë nuk kam asgjë kundër takimit, por unë jam duke pritur për rezultatin e tarifës. Nëse do të takohemi diku nuk e kam problem, por nuk do të ketë negociata të vërteta për ndonjë çështje statusi”, theksoi Vuçiç duke kujtuar se ai gjithashtu u takua me Thaçin dhe Kurtin në Munih.
