Presidenti Ilir Meta ka sulmuar sërish ministren e Drejtësisë Etilda Gjonaj se ajo duhej të ishte në prokurori dhe jo të ulej në një tryezë me prokurorët dhe ambasadoren amerikane Yuri Kim.
Duke iu referuar konferencës mbi “Sfidat e prokurorisë së përgjithshme për reformën në drejtësi”, ku ishte pranishme edhe ministrja e Drejtësisë, kreu i shtetit thekson përmes zëdhënësit të tij, se ndërkohë që Gjonaj akuzohet për 4 vepra penale, prokurorët e kanë ftuar atë në tryezën e diskutimit për reformën në drejtësi.
“Tallja me Reformën në Drejtësi dhe bërja e ligjeve puçiste anti-kushtetuese pati meritë të madhe për të mbledhur kaq shumë shqiptarë kundër grushtit të shtetit, ku Ministrja e Drejtësisë, siç është provuar nga shkresat zyrtare, akuzohet për 4 vepra penale. Ndërsa të gjithë prisnin që Prokuroria të vepronte ndaj saj, sot e shohin si pjesë të frontit të Ramaformës në konferencën e Prokurorisë duke qenë edhe krenare! Pandëshkueshmëria, Padrejtësia dhe Pafytyrësia kanë arritur majat! Herën tjetër do mblidhen shumë herë më shumë se dje, shqiptarë të ndershëm dhe me dinjitet, që s’mund të pranojnë këtë Kryemaskaradë! TURP! SHAME ON YOU!”, shkruan zëdhënësi i Ilir Metës, Tedi Blushi.
