Një nga gratë ikonë të Partisë Socialiste, Arta Dade i ka dhënë një goditje jo të vogël Elisa Spiropalit, zëdhënëses së Qeverisë. Spiropali është një prej figurave kryesore të PS-së dhe Qeverisë që shfaqet më së shumti në media për të mbrojtur aktet e kryeministrit Edi Rama.
Por mënyra se si Spiropali bën politikën dhe mënyra se si e përfaqëson PS-në nuk janë vlerësuar nga zonja Dade.
Në një intervistë për ‘Newsbomb’, Dade është shprehur se ndjen keqardhje për kostot që Spiropali i ka krijuar personalitetit të saj.
“Më lejoni që mos merrem me gratë por sigurisht nuk mund të përfaqësojë ato ideale për të cilat u krijua forumi i Gruas Socialiste. Ndoshta duhet të bëjmë një intervistë tjetër sepse nuk dua të merrem me individë. Unë vetëm e kam mbështetur Elisa Spiropalin dhe kam vetëm një keqardhje që ka krijuar shumë kosto në personalitetin e vet”, është shprehur ish-ministrja e Jashtme.
Në mendjen e ish-diplomates, pas mocionit që iu rrëzua në kongres është një lëvizje e re, që mund të përfshijë të majtë e të djathtë, të rinjtë, apo zonën ‘gri’ dhe për këtë, ajo u bën thirrje, socialistëve të vjetër, bashkëthemelusve të saj që të koordinohen.
“Ne që kemi qenë që nga themelimi kemi detyrime ndaj anëtarësisë së thjeshtë të PS. Se vërtet i kemi dhënë kësaj partie por edhe kemi marrë kjo parti. Unë personalisht kam marrë respektin e njerëzve tani që nuk jam më në struktura drejtuese dhe në Parlament dhe për këtë i vlerësoj shumë ndaj kam mesazhin që duhet të koordinohemi, dhe të mos bëjmë atë që u bë me PD kur ishin në qeverisje që kanë reflektuar defekte të rrezikshme për demokracinë në vend, edhe tani që janë në opozitë”, ka deklaruar Dade.
