Portieri shqiptar i skuadrës së Lazios, Thomas Strakosha është renditur në vend të tretë si portieri më i mirë që luan në kampionatet evropiane të futbollit, duke kaluar disa nga emrat më të mëdhenj të këtij sporti
Nga Katerina Tafa
Portieri i kombëtares shqiptare të futbollit, Thomas Strakosha, prej kohësh ka qenë një nga gardianët më të mirë të Serisë A, por ecuria e sezonit të fundit futbollistik e ka ngjitur në elitën e portierëve më të mirë në Evropë.
Lojtari i skuadrës së Lazios është një nga emrat kryesor që e kanë ngritur shumë këtë ekip, madje duke e renditur momentalisht në krye të kampionatit më të madh të futbollit italian, duke kaluar kështu skuadra si Inter apo Juventus.
Strakosha gjithmonë është përfshirë nga mediat italiane të top portierët e pothuajse të çdo jave të Serisë A, duke kaluar madje edhe emra si gjiganti Gianluigi Buffon. Megjithatë së fundmi Strakosha është renditur si portieri i tretë më i mirë në Europë.
Në këtë renditje shqiptari ka kaluar disa nga portierët më të mirë si Manuel Neuer i skuadrës së Bayern Munchen apo Marc-Andre ter Stegen, i cili ka mundur që të mbajë në këmbë skuadrën e Barcelonës, që duket se është në ditët e saj më të këqija.
Aktualisht skuadra e Lazios ndodhet në vendin e parë të Serisë A, megjithatë duhet theksuar se Juventusi ka një ndeshje më pak. Sipas statistikave të bëra publike nga faqja e “Who scored”, portieri kuqezi renditet i treti për pritjet që ka bërë në ndeshjet e zhvilluara deri më tani. Strakosha renditet një vend më pak se super portieri i Liverpulit, Alison Beker dhe vlerësohet vetëm 1.6% më mirë.
Gjatë këtij sezoni Thomas Strakosha ka qenë titullar i padiskutueshëm në të 32 ndeshjet që ka zhvilluar skuadra e Lazios në të gjitha kompeticionet dhe ia ka dalë të bëjë 32 pritje, ku duhet theksuar se një pjesë e tyre kanë qenë shumë të rrezikshme dhe se këto pritje kanë ndikuar shumë në ngritjen në renditje dhe në nivel të skuadrës italiane.
Gardiani i Kombëtares ka mbajtur “Clean sheets” (çarçaf të pastër), ose më saktë portë të paprekur nga golat në plot 9 ndeshje, duke rritur akoma më shumë nivelin e tij dhe atë të klubit për të cilin aktivizohet. Momentalisht vlera e merkatos së 24-vjeçarit shqiptar shkon në 25 milionë euro që është e njëjtë me atë të mbrojtësit të Veronës, Marsha Kumbullës, duke e rritur në këtë mënyrë jashtëzakonisht shumë çmimin e përfaqësueses sonë.
Shqiptari u kthye te ekipi i Lazios në tetor të vitit 2016 pas një shkëputjeje 1-vjeçare, kohë në të cilën ka luajtur për skuadrën e US Salernitana dhe që nga momenti i rikthimit te të kaltrit ai ka ndikuar shumë në ngritjen e këtij klubi, aq sa tashmë ndodhen në krye të Serisë A.
Në vetëm gjashtë muaj vlera e kartonit të gardianit të Lazios është rritur me plot 5 milionë euro. Lista e bërë nga “Who scored” për portierët më të mirë që luajnë për kampionatet shqiptare e kryeson gardiani i Montepeler, Geroine Ruli, në vend të dytë ndodhet portieri i Liverpool, Alisson,në vend të tretë ndodhet rojtari i Lazios, shqiptari Thomas Strakosha, portieri i Borussia Monchegladbah, Ian Somer ndodhet në vend të katërt, ndërsa lista plotësohet nga Atletico Madrid, Jan Oblak, i cili ndodhet në vend të pestë.
Shqiptari është duke ecur me hapa shumë të mirë dhe të sigurt dhe nëse vazhdon të mbajë rezultatet e arrira deri më tani nuk do të ishte habi që së shpejti ta shikonim duke luajtur edhe për emrat më të mëdhenj të futbollit botëror.
