Pas Shqipërisë edhe Kosova ka vendosur të marrë masa ndaj koronavirusit. Qeveria e Kosovës ka mbyllur shkollat deri më 27 mars.
Sipas qeverisë së Kosovës, do të pezullohen përkohësisht edhe linja e udhëtimit ajror dhe tokësor. Ndërsa do të ushtrohet kontroll i detajuar ndaj udhëtarëve nga ekipet mjekësore në të gjitha hyrjet dhe daljet e Kosovës. Deri më tani nuk ka asnjë të prekur nga koronavirusi në Kosovë. Megjithatë, duket se qeveria kërkon t’i paraprijë rasteve emergjente duke marrë masat paraprake.
Masat e marra nga qeveria e Kosovës: Vetëkarantim i detyruar për të gjithë qytetarët që hyjnë në Kosovë nga zonat epidemike me rrezik të lartë dhe të mesëm. Aktivitetet publike dhe jo publike mund të zhvillohen të mbyllura pa praninë e publikut.
Të ndalohet veprimtaria e restoranteve, klubeve të natës, palestrave, pishinave pas orës 23:00. Të ndalohet eksporti i pajisjeve, materialeve dhe medikamenteve mjekësore nga ana e operatorëve ekonomik dhe prodhuesve, përveç me Vendim të Qeverisë. Të gjitha institucionet qeveritare, si dhe ndërmarrjet publike dhe private detyrohen të ndërmarrin masa për mbrojtje dhe dezinfektim në të gjitha institucionet sipas udhëzimeve nga Ministria e Shëndetësisë, të cilat kanë të bëjnë me masat e përforcuara higjienike. Të gjitha ndërmarrjet publike dhe kompanitë privatë që kryejnë transport publik të udhëtarëve, obligohen të bëjnë dezinfektim të rregullt të mjeteve transportuese. Të ndalohet transporti i organizuar ndërkombëtar (autobus, minibus dhe të ngjashme) drejt vendeve me rrezik të lartë dhe anasjelltas.
Sëmundja vdekjeprurëse, që ka marrë mijëra jetë në shumë vende të botës, tash për tash nuk është konfirmuar të ketë mbërritur në vendin tonë.
Ndonëse shumë qytetarë deri më tani janë testuar me dyshimet se janë prekur nga koronavirusi, rezultatet kanë treguar se asnjëri prej tyre nuk është infektuar nga sëmundja, që origjinën e ka nga Kina.
Sipas, Institutit Kombëtar i Shëndetësisë Publike, deri me tani Kosova ende nuk ka të infektuar me coronavirus. IKSHP, apelon të kihet kujdes duke i respektuar rregullat e përcaktuara nga instituti.
