Nga Nikoleta Kovaçi/
Duhen të muaj për të shpëtuar mandatin e katër prokurorëve, emra të njohur të akuzës në vend. KLP merr katër vendime që nisin të zbatohen me datë 19 mars dhe që do të zgjasin fiks 3 muaj. Për shkak të përhapjes së koronavirusit dhe masave të ndërmarra nga të gjitha institucionet, edhe KLP-ja i ka marrë vendimet duke respektuar masat e imponuara nga Ministria e Shëndetësisë dhe Mbrojtjes Sociale.
Kështu secili prej anëtarëve ka firmosur veçmas vendimin për të zëvendësuar katër prokurorë që iu kishte mbaruar mandati. Janë katër vendime, përkatësisht me nr 80-84, që tregojnë edhe detajety e këtyre lëvizjeve. Në fakt, dy prokurorë nga pozicioni i prokurorit të prokurorisë së rrethit janë emërtuar drejtues të të njëjtave dikastere ku kanë shërbyer, ndërsa dy të tjerë, emra mjaft të njohur nga akuza në vend, janë lëvizur në drejtim të Tiranës, njëri nga Shkodra dhe tjetri nga Durrësi. Në vendimet përcaktohet edhe mekanizmi i pagesës për dy prokurorët që janë bërë drejtues, ndërsa ky vendim për ta zgjat vetëm 3 muaj, duke filluar nga nesër e deri me 18 qershor.
Prokurorët e rinj
Referuar këtyre katër vendimeve bëhet me dije se Këshilli i Lartë i Prokurorisë ka kryer lëvizjet e mëposhtme. Sipas tyre prokuror pranë Prokuririsë së Tiranës, u caktua përkohësisht, Anton Martini, i cili gjendej në Prokurorinë e Shkodrës. Po ashtu, Donika Prela do të ushtrojë detyrën e prokurores pranë Gjykatës së Shkallës së Parë, Tiranë, ndërsa prokurori i Dibrës, Rifat Kojku do të emërohet si drejtor dhe do të drejtojë përkohësisht prokurorinë pranë Gjykatës së së Shkallës së Parë, Dibër. Po ashtu edhe prokurori i njohur, Abaz Muça, do të drejtojë Prokurorinë e Matit deri në mesin e qershorit.
Vendimet
Një ditë më parë, KLP-ja njoftoi se: “Duke marrë shkak nga situata e krijuar nga përhapja e pandemisë botërore të shkaktuar nga Covid-19 si dhe në kuadër të masave të marra për parandalimin e përhapjes së këtij virusi në vend, Këshilli i Lartë i Prokurorisë me qëllim mbrojtjen e shëndetit të anëtarëve dhe personelit të administratës të tij, vendosi të pezullojë ushtrimin e veprimtarisë në ambjentet e punës dhe zhvillimin e seancave plenare me pranine e vëzhguesve të akredituar dhe përfaqesuesëve të medias.
Në këto kushte, si rrjedhojë edhe e mbarimit të afateve që përkon me datën 18.03.2020 dhe domosdoshmerinë e caktimeve të reja për të siguruar mbarëvajtjen e aktivitetit të këtyre prokurorive, Këshilli i Lartë i Prokurorisë vendosi të trajtojë këto çështje emergjente me anë të vendimeve qarkulluese”. Në vendimet e bëra publike nga vetë KLP-ja shihet se dy prokurorët e Dibrës dhe të Matit, që janë drejtues tashmë, do të trajtohen edhe me pagën e drejtuesit për 3 muajt në vazhdim. Po ashtu bëhet me dije se për dy lëvizjet e tjera, të Anton Martinit dhe të Donika Prelës duhet të vihen në dijeni prokuroritë e rretheve përkatëse dhe vetë Prokurori i Përgjithshëm. 
