Aksionet globale ranë dhe dollari u rrit më tej më të enjten, pasi ndërhyrjet e natës vonë nga Banka Qendrore Evropiane dhe Rezerva Federale Amerikane nuk arritën të kenë një ndikim të qëndrueshëm në tregjet e tronditura nga pandemia e koronavirusit, shkruan Financial Times.
Tregtimi i kontratave të së ardhmes iu drejtua rënies prej rreth 2.5 përqind për indeksin S&P 500 në Wall Street, ndërsa në Evropë indeksi i përbërë Stoxx 600 ra 1.2 përqind në tregtinë e mëngjesit të vonë, pasi ky tregues ishte hapur në rritje. Në Londër, indeksi FTSE 100 ra 1.4 përqind.
Lëvizjet erdhën pas masave të reja nga bankat qendrore për të provuar të qetësojnë trazirat ekonomike dhe financiare që burojnë nga shpërthimi i virusit, i cili po mbyll aktivitetin në pjesë të mëdha të botës perëndimore. Banka Qendrore Evropiane njoftoi të mërkurën vonë planet për të blerë bono shtesë prej 750 miliardë eurosh, pasi zhvilloi një mbledhje urgjente të komitetit të saj të përcaktimit të normës, ndërsa Fed tha që do të ofrojë ndihmë emergjente për marrëveshjet e anasjellta të riblerjes të tregut të parave.
Marco Wagner, ekonomist në Commerzbank, tha se ECB kishte shpalosur një “bazooka të re” në luftën e saj për të mbështetur zonën e euros. “Kjo do të ndihmojë obligacionet e vendeve me shumë borxh,” tha ai.
Indeksi i dollarit, i cili mat ecurinë e monedhës rezervë të botës kundrejt një shporte monedhash kryesore, u rrit deri në 1.5 përqind dhe po tregtohej në nivelet e tij më të larta në tre vjet ndërsa investitorët globalë nxituan të marrin fondet në dollarë për t’i ndihmuar ata të luftojnë pandeminë.
Zach Pandl, analist i monedhës në Goldman Sachs, tha që rritja e dollarit “reflekton rolin unik që luan monedha në ekonominë globale dhe sistemin financiar, duke reflektuar një pikëpamje midis investitorëve se ekonomia amerikane është më mirë e pozicionuar për të qetësuar tronditjen e koronavirusit”./ Monitor
