Nga Nikoleta Kovaçi/
Gramoz Murataj dhe Elvis Mulaj kanë kërkuar lirinë në Gjykatën e Apelit. Ata kan apeluar vendimin e Gjykatës së Shkallës së Parë që i ka lanë në masën e “burgut pa afat”, ndërsa u arrestuan kohë më parë në lidhje me ushtrimin e lojërave të fatit. Por edhe Gjykata e Apelit ua ka refuzuar lirinë dy të arrestuarve të cilët sipas të dhënave janë paraqitur në gjykatë nën masa të rrepta sigurie dhe tek e tek.
Sipas të dhënave, ata i kanë kërkuar gjykatës edhe nëpërmjet mbrojtësve të tyre ligjor t`iu ndryshohet masa e sigurimit. Madje edhe për shkak të situatës së rënduar nga virusi Covid-19. Por kreu i trupit gjykues ka pretenduar se në vendin ku mbahen dy të paraburgosurit, janë kushtet e mjaftueshme për të vijuar këtë masë, ndërsa ende nuk kanë përfunduar hetimet për ta dhe grupin e shumtë të personave që u kapën në një operacion të gjerë të Policisë së Shtetit në bashkëpunim me prokurorinë.
Arrestimet
Kujtojmë se mega-operacioni i 20 dhe 21 shkurtit ka pasur për qëllim goditjen e aktiviteteve kriminale dhe të ushtrimit të lojërave të fatit në mënyrë të paligjshme. Në kuadër të atij operacioni që ka zgjatur deri në orët e para të datës 21 shkurt u shoqëruan në polici 184 persona, ku numrin më të madh e pati Elbasani me 100 të ndaluar.
Por arrestimi i Gramoz Muratajt dhe Elvis Mulajt në Qytet Studenti ishte një prej arrestimeve më të bujshme. Emri i Muratajt sipas policisë lidhej edhe me një mori ngjarjesh të tjera brenda dhe jashtë vendi, ndërkohë që Mulaj u konsiderua si një i arrestim i bujshëm për shkak se është vëllai i Natasha Mulajt, kryetares së Kolegjit të Posaçëm të Apelimit, shkalla e dytë e Vettingut. Vëllait tjetër të tyre, para 3 muajsh i vunë tritol në banesë në Qytet Studenti, ngjarje që sërish bëri zhurmë për shkak të lidhjes me kreytaren e KPA-së.
Katër ditë pas arrestimit ata kërkuan lirinë në Gjykatën e Shkallës së Parë, ndërkohë që u lanë në burg bashkë me 53 persona të tjerë që dolën nga i njëjti operacion kombëtar. Ata akuzohen dhe po hetohen se ushtronin aktivitetin e lojërave të fatit dhe basteve online nëpër lokale të ndryshme që menaxhoheshin prej tyre.
