LaLiga dhe Federata Spanjolle e Futbollit kanë rënë dakord që të zgjasin pezullimin e të gjitha ndeshjeve të futbollit, profesional dhe jo profesional, deri në një afat të pacaktuar.
Kur gjendja në Spanjë nga koronavirusi është alarmante pezullimi i ndeshjeve do të jetë në fuqi derisa autoritetet kompetente të japin garanci se nuk rrezikohet shëndeti i futbollistëve, punonjësve të klubeve dhe tifozëve.
“Komisioni i Asamblesë së Federatës Spanjolle miratoi këtë të hënë më 23 mars, pezullimin e të gjitha ndeshjeve të futbollit profesional dhe jo profesional. Ato mund të rikthehen vetëm kur autoritetet kompetente qeveritare ta konsiderojnë situatën të rikthyer në normalitet dhe që nuk paraqet ndonjë rrezik për shëndetin e futbollistëve, punonjësve të klubit dhe publikut”, thuhet në njoftimin e Federatës Spanjolle të Futbollit.
Spanja konsiderohet si një nga vendet më të prekura nga koronavirusi. Pas Italisë, ajo është vendi i dytë më i goditur nga COVID-19 ku ditën e sotme numri i viktimave ka shkuar në 2100.
Gjithashtu mediat e huaja kanë shkruar se edhe zv/kryeministri i vendit, Calvo Soffre është prekur nga COVID-19, por është shëruar.
Në karantinë ndodhet edhe kryeministri i vendit Pedro Sánchez, pasi bashkëshortja e tij kishte takuar një person të prekur me koronavirus.
