“Mua nuk më dhimbset kjo qeveri dhe aq më pak vetja. Mua më dhimbset më së pari populli dhe lënia e atij pa qeveri. Po lihet populli pa një qeveri që e ka votuar. Po doni ta lini popullin pa qeveri në një moment të rëndësishëm të përhapjes së koronavirusit.”
Ky është qëndrimi që Albin Kurti mbajti në Kuvend teksa po diskutohet për mocionin e mosbesimit ndaj Qeverisë së tij, të kërkuar nga ish-partneri në koalicion, Lidhja Demokratike e Kosovës.
“Populli e di që unë nuk e kam mbështetjen tuaj si pjesë të PAN-it dhe nuk e kam as mbështetjen e disa prej deputetëve të LDK-së. Por ju të gjithë e dini që unë e kam mbështetjen e popullit, tha Kurti.
Sipas kryeministrit, “motori i këtij shkarkimi është pazari presidencial për shkëmbimin e territoreve”.
Albin Kurti deklaroi nga foltorja e Kuvendit se presidenti Hashim Thaçi i ka konfirmuar se ekziston marrëveshja e gatshme me Serbinë. Por ai theksoi se me të kryeministër nuk do të kishte marrëveshje për shkëmbim territoresh, duke ironizuar edhe zyrtarët amerikanë që kanë kundërshtuar qëndrimet e tij.
“Me mua kryeministër nuk ka marrëveshje për shkëmbim territoresh as në Shtëpi të Bardhë, as të gjelbër dhe as të kuqe. Unë e di që marrëveshje të gatshme ka. Këtë ma ka konfirmuar edhe Presidenti në takim”, tha Kurti, duke shtuar se kërkesa për heqjen e taksës ndaj Serbisë kishte për qëllim daljen në publik të marrëveshjes së shkëmbimit të territoreve midis Kosovës dhe Serbisë.
