Turqia ka filluar të shtrëngojë rradhët sa i përket eksportit të respiratorëve jashtë vendit.
Shteti turk ka vendosur që t’i mbajë ato për të plotësuar kërkesat e veta në luftën ndaj koronavirusit.
Megjithëse Turqia ka eksportuar deri dje materiale mjekësore, ku një ndër vendet blerëse ishte edhe Shqipëria, tashmë urdhri ka qenë i prerë; asnjë respirator jashtë vendit.
Vetë kryeministri Edi Rama theksoi dje se shteti shqiptar i bleu dje Turqisë pajisje mbrojtëse për personelin shëndetësor, ndërsa sot mbërritën nga Ankaraja edhe autoambulancat.
Turqia prodhon masivisht respiratorë, ventilatorë, tuba intubimi apo monitorë të kujdesit intensiv. Por, sipas ministres turke të Tregtisë Ruhsar Pekcan ato do të eksportohen vetëm me lejen e shtetit.
Turqia është një nga vendet e prekura nga koronavirusi ku deri më tani shënohen 59 viktima dhe 2 mijë e 433 të prekur.
Nuk është vetëm Turqia ajo që ka bllokuar eksportin ndaj materialeve mjekësore por edhe vendet e BE-së. Për këtë arsye, krerët e Kuvendeve të Ballkanit Perëndimor i bënë thirrje Brukselit të lehtësojë masat për vendet e këtij rajoni dhe të zhbllokojë eksportet e pajisjeve shëndetësore përfshi dhe respiratorët.
