Piramida më e madhe në Egjipt u zbukurua të hënën në mbrëmje me mesazhe uniteti dhe solidariteti, ndaj të gjithë atyre që po luftojnë anembanë me pandeminë Covid-19.
“Qendro i sigurt”, “Qendro në shtëpi” dhe “Faleminderit atyre që na mbrojnë”, ishin pikërisht këto mesazhe që ndriçuan në ngjyrë blu dhe jeshile përgjatë strukturës së pllajës së Gizës, në jugperëndim të kryeqytetit Kajro.
Egjipti ka regjistruar deri më tani 656 raste me koronavirus, përfshirë 41 vdekje. Nga totali i të infektuarve, 150 raportohet se janë shëruar. “Sektori i turizmit është një nga industritë më të prekura, por përparësia jonë është shëndetësia”-tha ministri i Turizmit Khaled Al Anani për “Gulf News”.
Egjipti ka kryer operacione gjithëpërfshirëse të dezinfektimit edhe nëpër vende arkeologjike dhe muze. Në të njëjtën kohë, masa të rrepta për distancimin shoqëror janë vendosur për të zvogëluar rrezikun e infektimit midis 100 milionë banorëve të vendit. Vendet turistike dhe fetare janë mbyllur, po ashtu edhe shkollat, ndërsa trafiku ajror është ndalur.
Autoritetet kanë deklaruar gjithashtu një shtetrrethim gjatë natës, si dhe kanë kërcënuar me gjobë dhe burg. Të hënën, qindra u arrestuan për shkelje të urdhrave të shtetrrethimit. Organizata Botërore e Shëndetit e ka vlerësuar reagimin e Egjiptit ndaj pandemisë si “ të fortë dhe të përshtatur me situatën”. Por, ajo i bëri thirrje vendit më të populluar të botës arabe të forcojë burimet spitalore për t’u përgatitur më mirë për një transmetim të mundshëm më të gjerë.
Koronavirusi u shpall pandemi më 11 mars. Filloi në qytetin kinez Wuhan dhe është përhapur deri më tani në 183 vende.Mbi 727,000 njerëz janë infektuar dhe më shumë se 34,000 kanë vdekur në të gjithë botën, sipas një raporti të përpiluar nga AFP.
Fjala.al
