Komisioni Evropian po punon në një plan prej 80-100 miliardë euro për të ndihmuar shtetet anëtare të ruajnë vendet e punës në krizën e koronavirusit përmes një skeme evropiane “risigurimi” të papunësisë.
Qëllimi i planit është krijimi i një sistemi në nivelin Evropian që lejon instrumente financimi përmes mbështetjes publike për punëtorët në mënyrë që të shmangin largimet nga puna sa më shumë që të jetë e mundur.
Prandaj, Komisioni mund të kërkojë të aktivizojë nenin 122 paragrafin 2 të Traktatit, sipas të cilit një shtet anëtar mund të marrë ndihmë financiare nga BE, nëse “e gjen veten në vështirësi ose kërcënohet seriozisht për shkak të fatkeqësive natyrore ose rrethana të jashtëzakonshme përtej kontrollit të tij “.
Neni 122 paragrafi 2 i Traktatit do të bëjë të mundur përdorimin e burimeve të buxhetit të BE-së, përfshirë mundësinë e Komisionit për lëshimin e letrave me vlerë pa iu drejtuar institucioneve ose instrumenteve të tjera financiare siç janë “Mesi” ose “Coronabonds”.
BE-ja do të sigurojë hua për t’i ndihmuar shtetet që të financojnë korporata në një afat të shkurtër. Në vendet ku këto mjete nuk janë të përfshira në legjislacion, burimet mund të shkojnë për të financuar përfitimet e papunësisë.
Propozimi i Komisionit pritet të paraqitet para Eurogroup më 7 Prill, gjatë së cilës ministrat e financave të eurozonës janë thirrur të diskutojnë opsionet e ndryshme në tryezë për t’iu përgjigjur ndikimit ekonomik të krizës së koronavirusit.
Burimi: Repubblica, Përshtati: Fjala.al
