Ish-kryeministri Ramush Haradinaj e ka cilësuar një mashtrim të madh lajmin se është vendosur masa e reciprocitetit me Beogradin.
Haradinaj theksoi se me heqjen e taksës së mallrave ndaj Serbisë, Kurti po i hap dyert ripushtimit ekonomik të Kosovës nga Serbia.
Përmes një postimi në rrjetet sociale, Haradinaj shkruan se masat e reciprocitetit që Kurti po mundohet t’i shesë si “shpikje politike”, ishte e vendosur në vendimin e Qeverisë më 21 nëntor, 2018, kur Qeveria Haradinaj kishte marrë vendimin për taksën.
“Heqja e taksës 100% për Vuçiçin e Serbisë e Dodikun e Republikës serbe të Bosnjës, është nënshkrim i dhënë për të lejuar ripushtimin ekonomik e tregtar serb në Kosovë. Vendimi i Qeverisë i datës 21 nëntor 2018 vendosë taksën 100% në pikën 1, dhe po ashtu vendosë masat e reciprocitetit ndaj Serbisë në pikat 3, 4, 5, dhe 6 – të cilat sonte Kurti po mundohet t’ia shet popullit si “shpikje politike” e tij. Në fakt, vendimi i sotëm i Qeverisë në largim është heqje e taksës 100% dhe mbajtje e masave të reciprocitetit që i vendosëm ne dikur, por assesi nuk është reciprociteti i plotë politik, ekonomik e tregtar që e premtoi Kurti dhe e votoi dikur Kuvendi me rezolutë!”, thuhet në reagimin e tij.
