Nga Nikoleta Kovaçi/
Beteja me virusin e tmerrshëm që ka izoluar gjithë shqiptarët në shtëpitë e tyre ka bërë që policia të vërë në pranga ata që do të vëjë. Një prej tyre është edhe një prej emrave më të njohur që doli nga një përgjim i gjatë që lidhet me grupin e Avdylajve, përgjime që implikuan edhe disa emra deputetësh dhe ish-zyrtarësh të lartë.
Personi që ka patur ‘fatin’ të arrestohet nën këtë masë izolimi për t`i shpëtuar infektimit me virusin është Qerim Musha. 52-vjeçari është ndaluar në banesën e tij ndërkohë që ka qenë i kërkuar si pjesë e operacionit të njohur si Vol-vo 4, nga i cili u ndaluan edhe shumë emra të njohur në vendin tonë.
Musha ka qenë shofer i Arben Çukos kur ky i fundit ka drejtuar Drejtorinë e Përgjithshme të Burgjeve, ndërkohë që u akuzuan dhe u hetuan për marrje parash për një transferim të një të burgosuri. Transferimi u tha se erdhi si rezultat i ndërhyrjes së Mushos. Por ai tashmë ka mundësi të mbrojë veten kundër kundër këtyure akuzave, kur në fakt, asnjë prej zyrtarëve dhe ish-zyrtarëve nuk gjendet në qeli për atë çështje.
Arrestimi
Kapet dhe ndalohet një tjetër person i shpallur në kërkim në kuadër të operacionit policor Vol-Vo 4. Policia tregon se bëhet fjalë për ish-shoferin e ish-kreut të Burgjeve, Arben Çuko. 52-vjeçari i ndaluar është Qerim Musha. Gjykata e Tiranës ka dhënë për të në mungesë masën “arrest me burg” për veprën penale “Korrupsioni pasiv i funksionarëve të lartë shtetërorë ose i të zgjedhurve vendorë”.
Ish-shefi i Qerim Mushës, Arben Çuko, ra në pranga në kuadër të operacionit “VOL-VO 4” në 18 tetor të vitit 2018 nën të njëjtën akuzë. Ai u lirua bashkë me Arben Ndokën me 15 nëntor 2018, pasi gjykata vendosi të ndryshojë masën nga “arrest me burg”, në “arret shtëpie”. Emri i Arben Çukos doli në përgjimet e grupit ‘Avdylaj’. Çuko akuzohet se në kohën kur ka qenë në krye të Drejtorisë së Burgjeve ka miratuar transferimin e të dënuarit Olsi Karagjozi kundrejt ryshfetit 3.000 euro, si dhe i përfshirë në biseda me pjesëtarët e grupit të Shijakut.
Arben Ndoka u arrestua pasi rezultonte i përfshirë në një skemë tjetërsimi pronash Shëngjin. Në lidhje me këtë ndalim policia e Shtetit bëri me dije se: “Në vijim të punës për kapjen e personave të shpallur në kërkim, specialistët për Hetimin e Krimit Ekonomik e Financiar në DVP Tiranë, kanë bërë kapjen e shtetasit Q. M., 52 vjeç, banues në Tiranë, person i shpallur në kërkim nga Departamenti i Policisë Kriminale në Policinë e Shtetit, në tetor të vitit 2018-s, në kuadër të operacionit policor Vol-Vo 4. Gjykata e Shkallës së Parë për Krime të Rënda Tiranë ka caktuar masën e sigurimit personal “Arrest në burg” për shtetasin Q. M., pasi dyshohet se ka kryer veprën penale “Korrupsioni pasiv i funksionarëve të lartë shtetërorë ose i të zgjedhurve vendorë”. Materialet i kaluan Prokurorisë, për veprime të mëtejshme”.
