Shqetësimi që është ngritur në publik pas vendimit të kryeministrit Edi Rama për të mos lejuar pagesën e qirave në Shqipëri për shkak të izolimit nga koronavirusi, ka rikthyer përplasjet politike.
Partia Demokratike akuzon Ramën se është duke nxitur përplasjen sociale me këtë vendim.
“Në Shqipërinë e varfëruar, shumë qytetarë jetojnë me qiratë që marrin, një pjesë tjetër paguajnë shpenzimet e tyre me qiratë dhe një grup tjetër paguajnë këstet e kredive me to. Mospagesat e qirasë do të ulin jo vetëm të ardhurat për qiradhënësit, por gjithnjë e më shumë shqiptarë nuk do të kenë aftësi paguese. Ekonomia në vend do të goditet akoma më keq në zinxhirin e konsumit. Dhe kjo vetëm do të shtojë varfërine dhe numrin e të varfërve”, thuhet në reagimin e PD-së.
PD i kërkon kryeministrit Rama që të marrë shembullin e homologut në Kosovë, Albin Kurti, i cili vendosi që shteti të paguajë 50% të qirave për bizneset e vogla dhe të mesme.
Por këtyre akuzave i është përgjigjur vetë Rama, duke këmbëngulur se akti është i drejtë pasi ndodhemi në situatë lufte.
“Ndërkohë që kam publikuar parimin e nismës së Aktit Normativ mbi pagesat e qerave të të dëmtuarve rëndë nga lufta që kanë humbur momentalisht aftësinë paguese dhe janë nën lloj-lloj presionesh, deri edhe të rënda nga qeradhënës të caktuar, shoh që ende pa dalë akti PD-ja është lëshuar siç di vetë kur prek majën e dëshpërimit! Sa gjynah që janë, nuk e gjej dot pse Zoti nuk ua ushqen fare vajin e kandilit të trurit as në këtë kohë të errët, po nuk kemi ç’bëjmë! Akti Normativ po bëhet gati, e meqë sonte kisha konfirmuar praninë në studion e Opinionit, do të kem mundësinë t’ju shpjegoj edhe qeramarrësve më hallexhinj, edhe qeradhënësve në hallin e tyre, edhe të gjithë të tjerëve me hallet përkatëse të kohës që jetojmë, se sa i drejtë është ky Akt Normativ, me ligj e me zakon, e se sa e fajshme është në mes të luftës kjo kundërvënie e verbër e një çete vulëhumburish (pa din, pa iman e pa asnjë hall tjetër veç ëndrrës së tyre në beze), ndaj njerëzve më në hall të kësaj lufte”, shkruan Rama.
