Ish-ministri i Brendshëm Saimir Tahiri do të thirret në gjykatën e Apelit më datën 9 prill. Apeli do të gjykojë kundërshtimin nga ana e Tahirit të vendimit që mori gjykata e shkallës së parë, e cila e dënoi me rreth 5 vite burg ish-ministrin e Brendshëm, por që iu konvertua në 3 vjet e 4 muaj në punë të detyruar.
Tahiri apeloi çështjen e cila do të gjykohet nga Gjykata e Apelit më datën 9 prill, ku bashkë me ish-ministrin do të gjykohet edhe ish-drejtori i Përgjithshëm i Policisë së Vlorës, Jaed Çela.
Seanca do të mbahet në orën 10:30. Ajo do të zhvillohet pa praninë e mediave me qëllim që të shmangen kontaktet dhe parandalohet përhapja e koronavirusit, ku këtë herë Tahiri do t‘i duhet të ‘thyejë’ karantinën.
Trupa e gjyqtarëve që do të gjykojë Tahirin do të jenë:Albana Boksi Kryesuese, Nertina Kosova Anëtare, Nure Dreni Anëtare
Tahiri u dënua me 5 vjet burgim për shpërdorim detyre, por nuk u gjet fajtor për akuzat e trafikut të drogës.
Ai u dënua me 5 vjet burgim, por duke qenë se ai më parë kishte pranuar gjykimin e shkurtuar, atëherë dënimi, sipas vendimit, u konvertua në 3 vjet e 4 muaj shërbim prove. Ndërkohë që si Samir Tahiri ashtu edhe Prokuroria e kanë apeluar këtë vendim në Gjykatën e Apelit të Krimeve të Rënda./FJALA.AL/
