Në Itali, disa shqiptarë në Trieste kanë nisur shpërndarjen e disa ndihmave ushqimore për njerëzit në nevojë. Këtë e komunikon dhe një qytetar italian përmes një videoje që po qarkullon në rrjetet sociale.
Italiani e vlerëson shumë gjestin e shqiptarëve dhe i bën thirrje popullit të tij të marrin një shembull të mirë dhe mos të rrinë e të këndojnë nëpër ballkone, por të ndihmojnë njerëzit të cilët ndodhen në vështirësi në një kohë kur vendi prej ditësh tashmë ndodhet në karantinë.
Në video, italiani tregon qeset e mbushura me ushqime, të përgatitura nga shqiptarët për njerëzit në nevojë dhe i bën thirrje Conte-s që të ndërmarrë veprime konkrete pasi njerëzit janë duke vuajtur nga uria.
“Komuna e Triestes, e qytetit tim Evropian, ky është një mesazh për kryebashkiakun, shikoni këtu, ja ç’duhet të bëni. Merrni shembull nga miqtë tanë shqiptarë, shikoni këtu se çfarë bëjnë, bëjnë gjithçka që munden për njerëzit. Shikoni miqtë shqiptarë çfarë bëjnë, qese me ushqime për të gjithë pesonat në nevojë, makarona, miell, vaj.. I dashur kryebashkiak leri llafet, lëvizni këmbët, fakte jo fjalë…njerëzit kanë uri…
Shikoni sa të zotët, të mësojmë nga to. Mos dilni të këndoni në dritare, njerëzit kanë uri. Shikoni këtu, shkojnë në shtëpitë e njerëzve që kanë uri, pensionistëve dhe njerëzve që nuk kanë lekë. Zgjohu, Konte, shihni ndihmën e shqiptarëve, na duhet punë konkrete, njerëzit kanë uri, shihni kanë siguruar dhe ilaçe për njerëzit. Lëvizni këmbët….jo fjalë…luani b*thën…fuck sistemin”, – shprehet qytetari në video, që nuk rresht së falenderuari shqiptarët.
