Ish-ministri i Drejtësisë, dhe njëkohësisht ish-deputeti i Lëvizjes Socialiste për Integrim, Ylli Manjani iu është bashkuar reagimeve pasi qeveria miratoi aktin normativ për qiratë për bizneset dhe qytetarët.
Në një postim në ‘Facebook’ Manjani tha me ironi se sipas Kryeministrit Edi Rama, të cilin e quan Kryeplak, masa më efikase anti-97’ është pagesa e Koncensioneve të PPP-ve.
Manjani theksoi se bota demokratike pa dyshim që nxjerr rregulla kufizuese për biznesin, por asnjëherë nuk fut njerëzit në sherr dhe kurrë nuk u thotë qiramarrësve mos paguani qiranë.
Postimi i Ylli Manjanit:
Pra sipas Kryeplakut, po të mos paguhen Koncensionet e PPP u bëka ’97’-a.
Kurse mospagesa e qerave, për pasojë e zinxhirit të shpenzimeve që vijnë prej tyre lufton virusin…!?
Po ’97 sikur ndodhi kur u prish zinxhiri i pagesave që njerëzit kishin programuar nga të ardhurat e fajdeve, jo pse shteti nuk paguante kontratat publike..!!
Pra, masa më efikase anti-’97-të duhet të jetë pagesa e qerave që të financohet zinxhiri i pagesave të tjera që kanë njerëzit për të bërë, jo pagesa e qeverisë të faturave të koncensioneve.
Nëse ka mundësi për të dyja, aq më mirë. Por nëse duhet të zgjedhim kush është më e rëndësishme, pa dyshim që është qeraja e pasurive private. Efekti i tyre është kapilar. Madje dëmton edhe vetë shtetin që ka planifikuar në buxhet tatimin e qerasë.
Nejse, situatë infeksioni është kjo punë… Do kalojë! Jam i bindur që po.
Dhe meqë ra fjala, bota demokratike pa dyshim që nxjerr rregulla kufizuese për biznesin, por asnjëherë nuk fut njerëzit në sherr dhe kurrë nuk u thotë qeramarrësve mos paguani qeranë. Në asnjë rast nuk goditen kontratat por orientohen palët drejt riskedulimit të detyrimeve. As në situatën e COVID19.
Nga ana tjetër qeveritë paguajnë sa munden dhe, gjithmonë gjykatat janë garanci për çdo mosmarrveshje.
Pra asnjë krahasim me ta nuk qëndron!/Fjala.al/
