Kur kemi hyrë në një periudhë prej gati 1 muaj në karantinë nga koronavirusi, qeveria ka treguar se si do të nisë procesi i lehtësimit të masave hap pas hapi.
Procesin e lehtësimit të masave e ka bërë të ditur vetë kryeministri Rama në Facebook.
Sipas tij gjithçka do të nisë me makinat private dhe me njësitë tregtare. Ndërsa qeveria sipas tij, po bëhet gati t’i drejtohet Kuvendit për ndryshimet në Kodin Rrugor dhe Penal.
Sipas Ramës, skelja e masave nuk është më kundërvajtje administrative që ndëshkohet vetëm me gjobë, por shkon nga gjoba, konfiskim mjeti dhe heqje lirie.
“Lehtësimi i masave do të bëhet gradualisht. Këtu nuk bëhet fjalë për mbarimin e një lufte që po presim gjermanin e fundit të largohet dhe do këndojmë himnin. Do fillojë gradualisht hapja e makinave private. Por nëse ti e përdor makinën tënde që shkon në punë, për të bërë edhe gjëra të tjera, apo për të marrë edhe dikë tjetër me vete, atëherë ty të hiqet leja e drejtimit dhe të merret makina. Nuk bëhet fjalë për muaj por për vite. Do të bëhemi gati edhe për hapjen e njësive tregtare. Por të gjithë ata që do hapin dyqanet duhet të përgatiten për masat mbrojtëse, që të jenë gati kur të nisim hapjen. Gjithsesi, siç e lajmërova kemi nisur përgatitjen për t’ju drejtuar Parlamentit për ndryshimet në Kodin Rrugor dhe Penal. Dhe shkelja e masave nuk është më shkelje administrative, por penale dhe çon në heqjen e lirisë tuaj. Ju nuk mund të dilni në lagje e të bëheni rrezik për të gjithë njerëzit.
Nëse shkon në pikën që merr në makinë persona të moshuar, të sëmurë dhe për të cilët ti nuk je i autorizuar, kjo është e patolerueshme. Për popullin nuk ka gjoba. Gjobat dhe ndëshkimet janë për ata që shqetësojnë popullin dhe kërcënojnë shëndetin e popullit dhe vënë në rrezik shëndetin e tyre. Nuk mund të vish ti me Covid në krah e të ma sjellësh mua e të më shkaktosh mort, larg qoftë,”- theksoi kryeministri Rama.
