Shumë qytetarët pyesin shpesh se sa do të zgjasë koronavirusi që deri më tani ka prekur shumë vende të botës, duke shkaktuar mijëra viktima dhe mbi 1 milion të prekur.
Një nga pyetjet që i është bërë mbrëmjen e sotme në emisionin ‘Open’, kreut të qeverisë, Edi Rama nëse do të bëjmë plazh këtë verë, kryeministri është përgjigjur se duhet të përgatitemi të shkojmë në plazh, por me rregulla të reja.
“A do shkojmë në plazh? Unë shpresoj se po, por jo si dikur. Do shkojmë me rregulla të reja”, tha Rama. Shefi i qeverisë tha se në maj do të nisë hapja graduale e vendeve të punës, por duhet të përgatitemi të bashkëjetojmë me koronavirusin deri në 10 muaj, ndoshta edhe 3 vjet.
“Në fund të majit, do të shohim sa janë ata që kanë filluar punën dhe sa janë ata që nuk filluan dot. Hapja nuk do jetë si një ditë çlirimi. Do kemi hapje graduale dhe do bashkëjetojmë me armikun. Do përgatitemi për një jetë 2, 5, 10 muaj, disa thonë tre vjet, me rregulla të reja dhe duke u mbrojtur nga koronavirusi”, u shpreh Rama.
