Koronavirus ka bllokuar të gjithë botën duke marrë mijëra jetë njerëzish çdo ditë e duke prekur dhjetëra mijëra të tjerë.
Vendet që kanë numrin më të lartë të të prekurve dhe viktimave janë thuajse totalisht të paralizuar.
Virusi i rrezikshëm nuk ka përjashtuar as botën e futbollit ku yje ndër më të mëdhenjtë kanë pohuar se kanë rezultuar pozitiv ndaj kësaj sëmundje, duke çuar kështu në pezullimin e thuajse çdo kampionati.
Së fundmi është konfirmuar se edhe në futbollin shqiptar, janë 3 raste të prekurish nga COVID-19, diçka që është pranuar nga vetë presidenti i FSHF Armand Duka.
Në një prononcim të dhënë për “Në Fokus”, në “TVT”, është shprehur se janë 3 raste të prekurish nga bota e futbollit në Shqipëri, emrat e të cilëve nuk pranoi t’i thotë, duke ditur se një nga ta ka qenë pjesëtari i FSHF-së, Florian Riza.
Sipas Dukës dy nga këta të infektuar e kanë kaluar virusin, ndërsa një tjetër vazhdon të përballet me këtë virus./Fjala.al/
