Ish-trajneri i kombëtares shqiptare Gianni De Biasi thotë se është duke shkruar një libër për aventurën e tij te kuqezinjtë.
Në një intervistë për prestigjiozen spanjolle Marca, De Biasi shprehet se po shkruan historinë e tij te Shqipëria, veçanërisht kualifikimin në Euro 2016. Ai shton se aktualisht ndodhet te kapitulli i tretë i librit, çka do të thotë se duhet të presim edhe pak derisa të shohë dritën e botimit.
“Po shkruaj në këto ditë historinë time me Shqipërinë futbollistike, po shkruaj dhe jam te kapitulli i tretë i këtij libri. Është diçka që po bëj për të hedhur në letër një eksperiencë që kam të qartë në kokë”, tregoi ish-trajneri i kuqezinjve për Marca-n
De Biasi ka folur edhe për të ardhmen e tij, duke shpjeguar se koronavirusi i hoqi mundësinë të nënshkruante një kontratë me një prej kombëtareve evropiane.
