Presidenti amerikan Donald Trump pasi dha mesazhet e tij të urimit për Pashkët, theksoi se SHBA do ta mposhtë koronavirusin.
Sipas Trumpit kriza po kapërcehet dhe se familjet “së shpejti” do të jenë në gjendje të kthehen në kishë. “Në shumë raste, ne do të ndahemi vetëm fizikisht nga kishat tona. Ne nuk do të rrimë atje së bashku ashtu siç do të donim”, tha ai në një video të postuar në llogarinë e tij në Twitter, e regjistruar në kopshtin e Shtëpisë së Bardhë.
HAPPY EASTER! pic.twitter.com/UX5Bhm82H2
— Donald J. Trump (@realDonaldTrump) April 12, 2020
Ai shtoi se “Kjo është një plagë në vendin tonë siç nuk e ka parë askush, por ne po fitojmë betejën, po e fitojmë luftën. Ne do të kthehemi së bashku në kishë”.
Para dy javëve Trump tha se SHBA do t’i rikthehej jetës normale pas Pashkëve, por kurba e lartë e pandemisë ka ndryshuar gjithçka.
Shtetet e Bashkuara deri më tani janë vendi me numrin më të madh të të prekurve dhe të të vdekurve në të gjithë botën. Sipas shifrave numërohen rreth 530 mijë të infektuar dhe më shumë se 20 mijë të vdekur.
