Vetëm pak kohë pas publikimit të shkrimit në “Fjala.al” mbi mashtrimet financiare në dëm të qytetarëve nga BKT dhe shoqëria NOA, në adresë të redaksisë kanë mbërritur denoncime të shumta të qytetarëve të cilët ngrenë shqetësimin se në kohë të ndryshme u janë marrë në mënyrë të padrejtë shuma të konsiderueshme nga këto dy institucione financiare.
Komentuesit deklarojnë se kanë pasur histori mashtrimesh dhe vjedhjesh me BKT dhe NOA nëpërmjet ndërhyrjeve në kodin e kartave kur tërheqin nga bankomatet e BKT-së, por edhe në komisione të ndryshme në momentin që shkojnë të tërheqin kreditë e marra, duke u mbajtur interesa mbi ato që parashikohen në kontratën e firmosur mes palëve, nga ana e qytetarëve dhe shoqërisë NOA dhe kjo e fundit më pas në bashkëpunim me BKT-në kur bëhet thyerja e çeqeve të kredive.
Disa qytetarë ngrenë pretendimin se ndonëse kanë denoncuar në institucionet ligjore në vend, shpesh denoncimet e tyre nuk i merren në konsideratë dhe hetimet treten gjatë rrugës, duke ngritur dyshimin e arsyeshëm për afera në mbylljen e këtyre skandaleve edhe nga institucionet e drejtësisë.
Një tjetër shqetësim masiv i ardhur në adresë të redaksisë së “Fjala.al” është edhe fakti që BKT dhe NOA në bashkëpunim me shoqëri private përmbarimore, me të cilat ato kanë kontratë për ndjekjen e “kredive të këqija”, kanë ndërhyrë në sekuestrime të paligjshme. Në ditët në vijim “Fjala.al” do të ndjekë me përparësi çdo denoncim qytetar dhe do të paraqesë fakte mbi forma të sofistikuara të mashtrimit që bien drejtëpëdrejtë në dëm të qytetarëve.
