Klodian Tomorri
Qeveria lajmëroi sot (dje) planin për riatdhesimin e shqiptarëve të mbetur jashtë shtetit nga bllokimi i kufijve. Sipas ministres së Infrastrukturës, rezidentët shqiptarë mbetur jashtë apo emigrantët që duan të kthehen në Atdhe do të riatdhesohen përmes kompanisë Air Albania. Por cilat janë kushtet e kthimit?
Fillimisht emigrantët apo rezidentët e mbetur jashtë do të prenotojnë fluturimin në Air Albania, të cilin do ta paguajnë me paratë e tyre. Më pas, po në faqen e Air Albania-s do të prenotojnë një nga hotelet e listuara aty për të ndenjur dy javë me detyrim në karantinë.
Hotelet e karantinës do të jenë në Durrës. Ata i ka gjetur me negocim Ministria e Turizmit, por paratë për qëndrimin e detyrueshëm dy javor do ta paguajnë vetë qytetarët fatkeq që kthehen. Me një fjalë, pasi kanë ndenjur më shumë se një muaj jashtë, të bllokuar nga mbyllja e kufijve, pasi kanë shpenzuar të gjitha paratë e mundshme, pasi mund të kenë mbetur edhe pa ngrënë atje ku kanë qenë të bllokuar, tani do t’u duhet të paguajnë edhe hotel dy javë në Shqipëri.
Pra njerëzit do të vihen në rresht, do të imbarkohen në Air Albania dhe pastaj kur të mbërrijnë, do të futen në hotele si tufa e deleve në vath. Të gjitha këto do t’i paguajnë me paratë e tyre. Por ministrja e Infrastrukturës siguroi se çmimet do të jenë të arsyeshme se i ka negociuar vetë qeveria.
Por nuk mbaron me kaq.
Fluturimet do të hapen edhe për shqiptarët që duan të ikin jashtë, apo italianët që janë në Shqipëri dhe duhet të kthehen në vendin e tyre. Sërish përmes Air Albania-s, monopolist të fatkeqësisë. Me një fjalë, Air Albania do të jetë kompani fluturimi, agjenci turistike e madje edhe flamuri i shpëtimit të shqiptarëve.
Tani pyetja është, pse vetëm Air Albania? Edhe Albawings-i kompani shqiptare është. Apo monopolet janë me efiçente për këto punë.
