Situata e vështirë që ka prodhuar koronavirusi në shëndetësi dhe në ekonominë shqiptare ka detyruar qeverinë që të ndryshojë buxhetin e shtetit të vitit 2020.
Ky është vendimi që ka marrë kabineti qeveritar i kryeministrit Rama, i cili është publikuar edhe në faqen zyrtare të Kryeministrisë.
Ndryshimet hyjnë menjëherë në fuqi, pasi janë miratuar në formën e një akti normativ që duhet të miratohet brenda 45 ditësh. 
Sipas këtij akti normativ shpenzimet e buxhetit të shtetit, sipas grupeve kryesore, janë:
407 205 milionë lekë shpenzime të buxhetit qendror,
16 200 milionë lekë fond rezervë
dhe 4 000 milionë lekë kontingjencë për risqet e borxhit.
Fondi rezervë i buxhetit prej 16 200 milionë lekësh do të përdoret nga Këshilli i Ministrave për raste të paparashikuara të njësive të qeverisjes së përgjithshme, si kontingjencë për paketën sociale antiCovid-19 dhe për emergjenca të tjera në kuadër të masave antiCovid 19.
Kontingjenca për risqet e borxhit prej 4 000 milionë lekësh përdoret nga ministri përgjegjës për financat për të kompensuar rreziqe potenciale nga luhatjet në kurset e këmbimit ose normat e interesit, me ndikim në shpenzimet për interesa.
Gjithashtu, shuma e garancisë së qeverisjes qendrore nga 11 500 milionë lekë shkon 26 500 milionë lekë. Po ashtu ndryshon edhe stoku i borxhit publik, i cili nga 1 197 139 milionë lekë shkon në 1 212 139 milionë lekë.
