Ish-Sekretarja Amerikane e Shtetit, Madeleine Albright thekson se qeveria kineze mban përgjegjësi për reagimin e ngadaltë ndaj pandemisë së koronavirusit.
Gjithsesi, sipas saj SHBA-ja duhet të marrë një qasje më të matur ndaj Pekinit dhe të ketë një frymë bashkëpunimi të ndërsjellë.
“Para së gjithash, unë mendoj se Kina me të vërtetë mban përgjegjësi për shumë probleme në fillim – duke mos zbuluar ndonjë informacion, mungesë transparence – dhe kjo është diçka me të cilën duhet të merremi”, i tha Albright gazetares Dana Perino, për Fox News.
“Unë mendoj se me të vërtetë dëmtoi tërë situatën edhe fakti që ata tentuan të na fajësojnë për disa gjëra”, theksoi ajo.
Sidoqoftë, ajo përsëriti gjithashtu se Pekini nuk mund të “shmangte përgjegjësinë” për të metat e tyre, përfshirë mungesën e transparencës.
“Unë mendoj se ne tani duhet të kuptojmë se si të zgjidhim disa nga problemet aktuale që ne kemi në drejtim të çështjeve të zinxhirit të furnizimit me Kinën dhe të merremi me këtë globalisht”, përsëriti Albright.
