Së fundmi janë publikuar disa video të cilat tregojnë se çfarë bëjnë shkencëtarët kinezë brenda laboratorit të tyre kërkimor në Wuhan.
Këto pamje janë publikuar pas pretendimeve të shkencëtarëve kinezë se koronavirusi nuk e ka origjinën nga ky laborator.
Instituti i Virologjisë në Wuhan të Kinës që mban më shumë se 1,500 lloje të viruseve vdekjeprurëse, është bërë qendra e polemikave mes krizës së pandemisë globale.
Në një video të transmetuar nga televizioni shtetëror kinez CCTV në muajin shkurt tregon se çfarë ndodh brenda Institutit.
Laboratori prej 34 milionë paundësh është i lidhur me Akademinë e Shkencave Kineze. Ai u përfundua në vitin 2015 dhe u hap zyrtarisht në vitin 2018.
Sipas pamjeve studiuesi, Zhang Huajun, demonstron se si ai dhe një koleg i tij vendosin dy shtresa të rrobave mbrojtëse dhe kalojnë pesë dhoma përpara se të hyjnë në pjesën qendrore të laboratorit.
Sipas Daily Mail, laboratori ka tre dhoma testimi, dy dhoma për ruajtjen e kafshëve, një “kuti” me viruse dhe një dhomë për “shpërndarjen” e kafshëve. Gjithashtu, supozohet se 24 shkencëtarë punojnë atje në të njëjtën kohë.
Studiuesi Zhang shprehet se ndërtesa është projektuar në atë mënyrë që ajri mund të rrjedhë në laborator nga jashtë, dhe jo anasjelltas, për të parandaluar rrjedhjet.
Megjithatë, sipas teorive mendohet se koronavirusi ka dalë pikërisht nga ky laborator i cili është i vetmi me nivelin më të lartë në Kinë.
Shumë vende, midis tyre SHBA dhe Gjermania kanë akuzuar Kinën për koronavirusin. Madje Donald Trump tha javën e kaluar se SHBA po heton nëse koronavirusi ka rrjedhur nga laboratori kinez drejt e tek njerëzit.
Nëse vërtetohet kjo sipas Trump, atëherë Kina do të mbajë përgjegjësi.
Megjithatë, Kina i ka hedhur poshtë akuzat duke iu referuar edhe OBSH-së se nuk ka gjetur prova se koronavirusi nuk ka dalë nga laboratori.
