Kufizimet e vendosura për shkak të pandemisë së koronavirusit penguan shumë miq, kolegë dhe dashamirës të Rikard Ljarjas t’i jepnin atij lamtumirën e fundit. E megjithatë kishte edhe nga ata që thyen karantinën, pavarësisht moshës, për t’i dhënë lamtumirën mikut të tyre, i cili ndërroi jetë dje.
Dhimitër dhe Roza Anagnosti ishin sot në banesën e aktorit të madh për ta përshëndetur për herë të fundit.
“E meritonte të përcillej me duartrokitje”, tha aktorja e madhe, Roza Anagnosti për kolegun e saj. “E bëmë për Rikardin”, shtoi ajo teksa gazetarja e News 24 vlerësoi faktin që ata kishin dalë nga karantina edhe pse në një moshë që rrezikohen shumë.
Edhe Dhimitër Anagnosti vlerësoi lart figurën e Rikard Ljarjas, si një ikonë të artit shqiptar.
