Organizata Botërore e Shëndetësisë ka mbledhur në një video-konferencë private UEFA-n dhe përfaqësuesit e klubeve evropiane, ku në qendër të diskutimeve ka qenë çështja se kur do të luhet futboll.
Sipas Organizatës Botërore e Shëndetësisë skenari ideal është ndërprerja e veprimtarive sportive deri në fund të vitit 2021.
Konferenca, që ishte parashikuar të zgjaste një orë, ka shkuar deri në 2 orë e gjysmë, ndërsa nuk kanë munguar as tonet e ndezura dhe sherri mes përfaqësuesve të OBSH-së dhe UEFA-s.
OBSH ka sugjeruar masa drastike sa i përket aktiviteteve sportive, duke u bazuar në studime për rreziqet që mund të sjellë një tjetër valë infektimesh vitin e ardhshëm, shkruan BBC.
Sipas ekspertëve zgjidhja më e mirë do të ishte që veprimtaritë të qëndronin të ndalura deri në vitin e ardhshëm, por kjo është kundërshtuar fort nga UEFA edhe pse kjo e fundit nuk ka asnjë detyrim ligjor për të zbatuar këshillat dhe direktivat e OBSH-së.
