Gazetari i njohur Artan Hoxha duke komentuar dekretimin e ligjit për ndryshimet në Kodin Penal nga ana e presidentit Ilir Meta, ka adresuar kritika të shumta në drejtim të kreut të shtetit.
Artan Hoxha thotë se ku shkuan videot që Ilir Meta premtoi se do t’i publikonte në ‘luftën’ e tij ndaj kapjes së Kushtetutës prej kryeministrit Rama.
Të gjitha këto sipas gazetarit Hoxha, Ilir Meta do t’i kapërdijë si një pako llokume.
Postimi i plotë:
“Na falni, ashtu siç është një muhabet …RESPEKTE… Vetëm një merak kam unë, çfarë u bë me ata provat dhe videot përvëluese që na u premtuan se do publikoni për “Grushtin e Shtetit” dhe për kapjen e kushtetutave?! Po ai hetimi parlamentar për shkarkimin e Metës, në çfarë sirtari sanitaresh ka përfunduar?! Po mua hëngra superhetimin për Dvoranin, çfarë do bëhet tani?! Uuuuu, se mu kujtua, më prezanton Dvorani, kaq e pat?! Do ta hajë tani, si pako me llokume, që krushqit i bëjnë dhuratë njëri-tjetrit, para se të shikoni pëlqimin e krushqisë,“-shkruan Hoxha.
Presidenti Ilir Meta disa muaj më parë u përfshi në një betejë ligjore me KED dhe kreun Ardian Dvorani, duke i akuzuar se po bëjnë një grusht shteti. Përplasja e Presidentit Ilir Meta me Ardian Dvoranin erdhi pas ngërçit në Gjykatën Kushtetuese dhe dublikimin e një vendi, për të cilin janë emëruar dy anëtare, Marsida Xhaferrllari nga Meta dhe Arta Vorpsi nga KED. Sipas Metës, Dvorani, shkeli ligjin dhe ka kryer dy vepra penale, shpërdorim detyre dhe përvetësim të titullit apo detyrës. Ai bëri edhe kallëzim në SPAK dhe për këto shkelje duke thirrur edhe protestën më 2 mars 2020. Nga ana tjetër, maxhoranca kishte nisur punën për shkarkimin e presidentin, dhe ende pritet të jepet vendimi i Komisionit të Venecias.
