Lumturie Xhafa nga Kruja punonte në fasonerinë ku plasi vatra e re e infektimit me Covid-19 para disa ditësh. Ajo dyshonte se ishte infektuar nga koleget e punës kështu që këmbënguli që t’i bëhej tamponi, i cili u realizua pas shumë telefonatash me numrin e vendosur në dispozicion nga ministria e Shëndetësisë, 127.
Përgjigja erdhi, ishte pozitive me Covid-19. Por kjo jo vetëm që nuk e qetësoi, por ka shkaktuar alarm në shtëpinë e saj ku jeton me prindërit e bashkëshortit dhe dy fëmijët e saj.
Të moshuarit, Xhuma Xhafa, 74 vjeçe dhe Ahmet Xhafa 82 vjeç, kanë telefonuar 127 por kanë refuzuar që të bëhet tamponi edhe pse ata janë kontakti më i afërt i Lumturies.
Mbesa e tyre Estela Xhafa, e cila jeton në Francë, denoncon tek gazeta Fjala, faktin që gjyshërve të saj nuk u bëhet tamponi për Covid-19.
“Jam shumë e shqetësuar për shëndetin e gjyshërve të mi, të cilët kanë dhe sëmundje të tjera. Spitali i Krujës ka refuzuar tu bëjë analizën duke iu thënë se ajo do të bëhet vetëm nëse simptoma të sëmundjes.
Ndërkohë publikisht thuhet se u bëhet tamponi të gjithë kontakteve të afërt me personin e infektuar, në të vërtetë kjo nuk ndodh. Por nëse ata presin që të shfaqin simptomat e rënda si mund të pretendojnë që t’i shërojnë duke marrë parasysh edhe moshën e tyre?”- shprehet Estela për Fjalën.
Gazeta Fjala kontaktoi me ministrinë e Shëndetësisë dhe mori këtë përgjigje; “Nuk bën teste spitali i bën njësia vendore. Duhet të telefonojnë 127”.
Mbesa e tyre thotë që e kanë telefonuar shumë herë 127, madje kanë kontaktuar edhe me drejtorin e spitalit Krujë, por kanë marrë përgjigje negative./Fjala.al
