Shoqata Holandeze e Futbollit do ndërpresë sezonin e Eredivisie, pasi qeveria zgjati ndalim të ngjarjeve të mëdha deri më 1 shtator për shkak të koronavirusit, duke u bërë kështu i dyti pas Jupiler League i Belgjikës nga nivelet më të larta evropiane, që anulohet.
Kryeministri i Holandës, Mark Rutte mbajti një konferencë për shtyp mbrëmjen e së martës (21 prill) për të zgjatur urdhrin e bllokimit nga 1 qershori deri në 1 shtator, i imponuar për shkak të shpërthimit të coronavirusit. Kjo nënkupton se klubet e elitës holandeze nuk mund të luajnë as me dyer të mbyllura, sepse policia do të duhet të jetë e pranishme nëpër ndeshje.
Deri në momentin e pezullimit të Eredivisie, Ajax në vend të parë dhe AZ Alkmaar e dyta po udhëhiqnin kampionatin kryesor të futbollit holandez.
Ndërsa Organi drejtues i futbollit holandez KNVB në një deklaratë për mediat vendase tha se “synon të mos vazhdojë zhvillimin e sezonit 2019-2020”,- por do të konsultohet me UEFA para se të marrë një vendim përfundimtar.
Ndërsa në mbledhjen e zhvilluar me 55 federatat e saj UEFA tha se disa liga evropiane mund të anulohen “në raste të veçanta”, që do të thotë se nëse është e pamundur zhvillimi i kampionatit atëherë ligat vendase kanë të drejtë t’i ndërpresin ato.
Ndërsa më tej në njoftimin e KNVB shtohet se klubet e Eredivisie do të takohen të premten (nesër), për të diskutuar pasojat e këtij vendimi “Klubet do të mblidhen ditën e premte për të diskutuar pasojat e vendimit”-thanë ata, ndërsa terrenet e trajnimit do të rihapen por “në kushte të rrepta” në mënyrë që lojtarët të mund të stërviten./Fjala.al/Katerina Tafa/
