Kryeministri Edi Rama në një komunikim të drejpërdrejtë në Facebook, ka paralajmëruar se pavarësisht lehtësimit të masave që pritet të merren në javën e ardhshme, nuk do të thotë se virusi nuk na vret më dhe ka ikur, përkundrazi ai do të vazhdojë të jetë aty deri në daljen e një vaksine.
Rama vuri theksin se deri në daljen e vaksinës normaliteti ynë nuk do të jetë si më parë dhe nuk duhet të shkelim më në shtëpitë e të afërmve apo miqve pa u siguruar një vaksinë për koronaviursin.
“Faza dy e strategjisë sonë të luftës me këtë armik të padukshëm nuk ndryshon shumë me atë të vendeve të tjera, por qasja ndryshon. Kjo sepse virusi nuk ikën me që ne rrimë mbyllur, por nuk na vret dot. Ama ai është aty, mbrapa derës së secilit prej nesh dhe sapo e hapim derën tonë, jemi të ekspozuar nga mundësia që të na godasë përsëri. Deri kur të dalë vaksina duhet të jemi të vëmendshëm si familje dhe si shoqëri që të mos goditemi prej tij. Deri në daljen e vaksinës, normaliteti ynë nuk do të jetë si më parë. për të ruajtur veten dhe të tjerët nuk duhet të shkelim më në shtëpitë e njëri-tjetrit, pa u zhdukur ky virus.,” është shprehur Rama./Fjala.al
