Kreu i Partisë Demokratike ka theksuar se kërkon një përballje televizive me kryeministrin Edi Rama, por ky i fundit e refuzon që prej vitit 2011.
Në një intervistë për emisionin “Java në RTSH”, ndërsa po fliste për situatën e krijuar nga koronavirusi, Basha theksoi se ai është i hapur për debat por kreu i qeverisë e refuzon, ndërsa shtoi se Rama do të mbajë përgjegjësi për gjithçka ka ndodhur në vend.
“Kam që nga viti 2011 që e kërkoj në një debat por ju e dini që ai ka refuzuar. Më duket se ka më shumë në fakt që refuzon,”-tha Basha.
Pjesë nga Emisioni:
Pyetje: Do të preferonit të bënin një debat me zotin Rama në këtë hapësirë publike, nën moderimin tonë?
Lulzim Basha: Do t’ju shkojë dëm përpjekja, sepse zotin Rama ka që prej vitit 2011 që e ftoj në debat, por ai nuk ka pranuar. Në çdo moment jam i hapur për debat, por ai ka refuzuar të vijë në debat me mua. Po mbushet dekada e dytë që refuzon të dalë në debat. Megjithatë, dua të them diçka. Kur të vijë dita, absolutisht çdokush do të mbajë përgjegjësi për veprimet dhe mosveprimet. Pa diskutim, këtu roli i kryeministrit është kyç. Ndërkohë që gjendemi akoma në këtë situatë, mendoj që ua kemi borxh shqiptarëve që, në vend të spektaklit që mund të ofrojë një debat i dëshiruar, për te cilin shpreh gatishmërinë time në çdo moment, që energjia dhe fokusi i kryeministrit të jetë tek detyrat që duhen kryer dhe nuk po kryhen.
