Myslimanët do të përjetojnë për herë të parë një maj Ramazani në izolim duke shmangur faljet nëpër xhami dhe mbledhjet në iftarë. Xhamitë do të jenë të mbyllura për faljet në masë dhe nuk do të shtrohen iftarët tradicionalë gjatë këtij muaji të shenjtë që festohet në të gjithë Botën nga data 23 Prill deri më 23 Maj.
Ky do të jetë një muaj ndryshe për të gjithë besimtarët dhe për këtë arsye kryetari i komunitetit mysliman Bujar Spahiu uron dhe beson tek mëshira e Zotit për të na ndihmuar që të kalojmë këtë situatë të vështirë.
Gjithashtu z. Spahiu rikujton edhe një herë besimtarët që edhe në këtë muaj nuk do të ketë adhurime në për xhamia e nuk do të organizohen iftare, duke respektuar udhëzimet e organeve shëndetësore.
“Të nderuar besimtarë, situata në të cilën jetojmë na ka detyruar të qëndrojmë më shumë në shtëpi dhe të kalojmë një kohë më të gjatë, me fëmijët tanë, më bashkëshortet dhe me prindërit. Le ta shfrytëzojmë këtë kohë për të kaluar më shumë kohë produktive me fëmijët, t’ju mësojmë atyre bukuritë e besimit tonë, t’ju mësojmë librin e Zotit dhe të krijojmë një ambient ku ata të kënaqen. Bashkëshortët të jenë mbështetje për njëri-tjetrin. Gjithashtu për të gjithë ata që jetojnë bashkë me prindërit të shtojnë sjelljet e mira ndaj tyre, fjalët e ëmbla dhe të bukura. Mos t’i harrojmë ajetet Kuranore dhe hadithet e Profetit Muahmed a.s mbi respektin dhe sjelljet ndaj prindërve.”
Janë 1.8 miliardë myslimanë në gjithë botën që po përgatiten për fillimin e muajit të shenjtë të ramazanit për shumë myslimanë. Por, vendet e shenjta të islamit, përfshirë mekën dhe medinën në Arabinë Saudite, dhe xhaminë Al Aqsa në Jeruzalem, do të jenë të zbrazura gjatë këtij muaji pasi autoritetet kanë këshilluar besimtarët të falen në shtëpitë e tyre.
